Chopsticks

Gumising si Sammy para gawin ang kanyang gawaing bahay. As usual, maaga siyang nagigising mga alas 3 ng hapon, upang maumpisahan nya ang kanyang trabaho ng maaga. Ngunit laking gulat niya ng makitang nagkakagulo ang buong Turon Town. Tinanong ni Sammy kung anong ang kaguluhan sa isang bata nngunit "Dada" lang ang kayang banggitin nito. Kung kaya ay kinuha na ni Sammy ang kanyang Bananacycle(bike na flat ang isang gulong) at nagsuksuk siya ng saging sa loob ng kanyang brief para hindi mapanis.

Bumubulusok na bumaba ang Bananacycle ni Sammy sa burol na kinalalagyan ng kubo niya. Dito niya nalaman kung ano ang nangyari. Isang karimarimarim na tagpo ang bumungad sa kanya. Lahat ng tanim at halaman ay naglaho. Naubos ang palay, nalagas ang dahon ng mga puno, pati ang mga puno ng saging nagkawalaan! Malaking problema ito para kay Sammy dahil iisa na lang ang saging na nasa kanya, at yun ay nasa brief niya!

Namutla sa takot si Sammy sa kanyang nakita. Paano na siya magtratransform bilang si Bananaman kung walang banana! At sa wakas gumana ang nangangalawang niyang utak. Inilabas niya ang kanyang 5110 at mabilis niyang tinext si Dodong, ang tindero ng saging sa kabilang bundok. Ngunit laking gulat niya nang hindi magsend ang SMS niya. Naalala niyang nagexpire na pala ang unlimited text niya habang katxt si Nena, ang chimay ni Mayor Bebang Batubalani.

Naisip ni Sammy na kailangan niya munang huminahon at alamin ang nangyari sa kanilang bayan. Nagtanongtanong siya sa mga taong bayan kung sino ang salarin sa krimeng ito. Ngunit sila man ay walang alam. Inabot na ng gabi ang pagiimbestiga ng ating magiting na bida ngunit ni isang matinong sagot ay wala siyang nakalap.

Susuko na sana si Sammy nang may lumapit na matandang ermetanyo sa kanya.

"Amang alam ko kung paano nangyari ito." sabi ng ermetanyo.

"Sino ang ay kagagawan nito?!" tanong ni Sammy habang sinasakal ang matanda.

"Bitiwan mo muna ako amang. Salamat, salamat. Hindi sino kundi ano. Ang may kagagawan nito ay isang higanteng tipaklong!" pabulong sa sabi ng ermetanyo.

"Sigurado ka ba diyan? Sa aking pagiimbestiga ay napagalaman ko na isang hukbo ng killer kuneho ang ngumatngat sa mga puno dito." bulong naman ni Sammy.

"Nagkakamali ka amang sapagkat nakita ng dalawang mata ko ang buong pangyayari. Kinain ng higanteng tipaklong ang lahat ng pananim. Alas dose ng hating gabi ang call time niya. Hintayin mo na amang. Eksakto malapit ng maghatinggabi."

"Mabuti pa nga."

Hinintay ni Sammy ang pagpatak ng hatinggabi sa Turon Town upang maliwanagan ang kababalaghang bumabalot sa mga missing halaman. Bumabagsak na ang mga talukap ng mga mata ni Sammy at nagsisimula nang tumulo ang kanyang laway sa antok nang may marinig siyang kaluskos sa di kalayuan. Biglang nagsing si Sammy at sa gulat ay muntik nang mahulog ang kanyang postiso. Totoo nga ang sinabi ng ermetanyong mabantot. Dahil nasa harapan niya ang isang tipaklong sa kasingtaas ng monumento ni Rizal sa Luneta!

Nilabanan ni Sammy ang kanyang hilakbot na mabilis na bumalot sa kanyang katawan. Nanginginig niyang nilabas ang kaisaisang saging na tinago niya sa kanyang brief at mabilisan nya itong sinubo. Sinigaw ni Sammy ng ubod ng lakas ang "Bananaman" at biglang may pumutok. Nabalutan ng usok si Sammy at siya ay biglang nawala. Lumantad ang isang matipunong lalaki na may gintong kasuotan. Sa dibdib niya ay may nakalagay na malaking letrang ‘B’, siya ay may berdeng kapa at berdeng maskara. Itim ang boots at red ang brief na mukhang maluwag dahil may berdeng sinturon ito. Sa wakas nagpakita na rin si Bananaman, ang pinakabaduy na superhero sa buong mundo!

Sa pamamagitan ng kapangyarihan ng saging makakaya ni Bananaman ang lumipad sa kalawakan, maglakbay na sing bilis ng kidlat, may pambihirang lakas ng 100 leon, maglakad sa nagbabagang apoy, kumain ng bubog, magsayaw ng tango at heto ang matindi kaya niyang maligo ng hindi nababasa!

Sinimulan ng ipamalas ni Bananaman ang kanyang kapangyarihan. Lumipad siya sa harapan ng Giant Tipaklong at bigla niya itong sinuntok. Nasaktan ang Tipaklong ngunit hindi ito nagpatalo. Inangat nito ang isa sa mga paa niya at akmang ihahampas ito kay Bananaman. Nailagan ni Bananaman ang higanteng paa ng tipaklong. Ilang beses nitong sinubukang Tumama ngunit pambihira ang bilis na pinamamalas ni Bananaman.

Napagod ang tipaklong. Tatapusin na sana ni Bananaman ang laban gamit ang Bananasword ngunit biglang nagbuga ang tipaklong ng berdeng likido sa ilong nito. Acido! Muntik ng maging turon sa Bananaman. Tuloy-tuloy ang pagbuga ng tipaklong ng acido at mukhang delekado ang lagay ni Bananaman dahil hindi siya makalapit.

Nakaisip ng paraan si Bananaman kung paano matatalo ang Giant Tipaklong at ang kanyang mabangis na ilong. Muli siyang lumipad at iniwasan ang mga talsik ng acido mula sa tipaklong. Binuhat niya ang isang malaking tipak ng bato at inihagis sa tipaklong. Bumulusok ang bato sa harapan ng tipaklong ngunit binugahan lamang nito ng acido at ito’y nawasak. Inaasahan naman ni Bananaman ang pangyayaring ito, ginawa lamang pain ang bato upang makalapit sa higanteng tipaklong. Sa distansyang ito, mahihirapang puntiryahin ng tipaklong si Bananaman, at ganoon nga ang nangyari.

Binanatan ni Bananaman ng isang malutong na sipa sa ulo ang tipaklong. Sinundan pa nito ng isang malakas na suntok sa tiyan. Nasaktan ang tipaklong sa sunod-sunod na pananakit ni Bananaman. Sa wakas nanghina na ang tipaklong at handa nang tapusin ni Bananaman ang laban. Dinukot niya sa loob ng kanyang Bananabrief ang isang matalim na bagay, ang Bananasword. Galit na pinutol ni Bananaman ang mga paa ng tipaklong, at nang akmang lilipad ito’y tinaga naman ang pakpak nito, pagkatopos hindi pa nakuntento, isinunod naman nito ang….

"Tapos na ang maliligayang araw mo Higanteng tipaklong!" sigaw ni Bananaman matapos nitong putulin ang ulo ng tipaklong.

At natapos din ang laban. Nagwagi ang kabutihan. Humukay si Bananaman ng isang malaking butas sa tuktok ng Bundok Aratelis sa pamamagitan ng Bananabeam at dito niya inilibing ang mga labi ng higanteng tipaklong. Lumipad siyang muli sa kabilang bundok upang kumuha ng mga puno at halaman kabilang ang mga puno ng saging upang itanim sa kanilang bayan. Wala pang 10 minuto at tapos na sa pagtatanim si Bananaman.

Nailigtas sa kapahamakan ang Turon Town. At mukhang hindi alam ng mga mamamayan na mayroong nagligtas sa kanila. Hindi nila alam na andiyan lamang sa tabi-tabi at nagkakalkal ng basura ang kanilang bida. At lalong hindi nila alam na mayroong namboboso sa kanila tuwing naliligo. Hindi nila alam na laging andiyan si…… Bananaman the super saging!